Mähram

Mähram (arap. مَحْرَم‎‎ — 1. gadagan zat, 2. garyndaş.) Yslamda jyns gatnaşygy haram bolan we nikalaşyp bolmaýan garşydaş jynsdaky kişi. Ýöne olar bilen sapara ýa-da syýahata gidip bolýar we ýekelikde galyp bolýar. Mähram bilen jyns gatnaşyk etmek zyna hasaplanýar.

Erkek

(Eý, mukminler!) Size (şular bilen nikalaşmak) haram edilendir: ejeleriňiz, gyzlaryňyz, gyz uýalaryňyz, kakaňyzyň aýal doganlary (ejekeleriňiz), daýzalaryňyz, erkek doganyňyzyň gyzlary, aýal doganyňyzyň gyzlary, sizi emdiren süýt eneleriňiz, süýt emşen uýalaryňyz, gaýyneneleriňiz, (jynsy gatnaşykda bolan) aýallaryňyzyň ýany bilen gelen öýüňizdäki öweý gyzlaryňyz. Ýöne (nikalaşyp), heniz jynsy gatnaşykda bolman (aýrylyşan aýallaryňyzyň gyzlary bilen nikalaşmagyňyzda) hiç hili günä ýokdur. Emma öz biliňizden önen (ogullyk alynmadyk) ogullaryňyzyň (aýrylyşan) aýallaryna (öýlenmegiňiz) we iki gyz dogany bir wagtda (nikaňyzda) birleşdirmegiňiz (hem haram edildi). Emma (nadanlyk döwründe öň bolup) geçeni geçdi biliň! (Siz oňa jogapkär dälsiňiz). Takyk, Alla Bagyşlaýjydyr, Rehimşepagatlydyr.

Kuran: sura №4, aýat №23.

Erkek aýaly bilen aýrylyşanda (talak) ýa-da dünýäden ötende oňa nikalaşmak halal bolýan kişiler:

Aýalynyň - gyz dogany
Aýalynyň - ejesiniň gyz dogany
Aýalynyň - kakasynyň gyz dogany
Aýalynyň - aýal doganynyň gyzy
Aýalynyň - erkek doganynyň gyzy

Zenan

Zenanlara çykmak haram bolanlar:

Kakasy
Ogly
Erkek dogany (ýa-da jigsi)
Kakasynyň erkek doganlary
Daýylary
Erkek doganynyň ogullary
Aýal doganynyň ogullary
Süýt emşen erkek doganlary (2 ýyl bir eneden emen)
Gaýynatasy
(Jynsy gatnaşykda bolan) äriň ýany bilen gelen öýdäki öweý ogullary. (Ýöne nikalaşyp, heniz jynsy gatnaşykda bolman aýrylyşan ärleriniň ogullary bilen nikalaşmakda hiç hili günä ýokdur.)
Öz dogran gyzynyň äri

Salgylanmalar