Ibn Hajyp medresesi
( XIV asyr)
Gadymy Ürgenjiň häzirki harabaçylygynyň günbatar gyrasynda örän gyzykly bir ymaratyň galyndylary ýerleşipdir. Onuň adyny ýerli ilat ibn-Hajybyň medresesi diýip tutýar. ibn-Hajybyň gabry diýlip görkezilýän keşananyň syrçaly ýazgylarynyň XIV asyra degişlidigi şeksizdir. Bu jaýa ýagty düşýän penjire goýulmandyr diýse-de boljak. Gümmezli jaýa bir wagtky ýykylan ymaratyň deregine gurlan bolmagy mümkin. Şol keşanaly jaýyň ýanynda zyýarata gelýänler üçin 6x6 metrlik zyýarathana bina edilipdir. Wagtyň geçmegi bilen bu ýerde ýazky metjit bilen birnäçe hüjreler we howuz döräpdir. Soňra ähli gurluşyklaryň töweregini palçykdan edilen haýat aýlapdyrlar.
Ýadygärlige demirgazyk tarapda ýerleşen gapydan girilýär. Giren ýeriňde dälizden öňdäki we çepdäki üsti açyk howlujyklara, däliziň üstündäki gümmezjige gözüň düşýär. Eger dälizden dogry ýöräp içerki 8x12 metrlik howla girsek, hüjreler bilen peştaby synlap bolýar. Peştak gündogar tarapa bakyp dur. Köneürgençde täze medrese gurulýança bu ýerde oglan okadylandygy mälim.